Хабарҳои ДДТХ (915)
ИШТИРОКИ РЕКТОРИ ДДТХ ДАР КОНГРЕССИ БАЙНАЛМИЛАЛИИ “ТАНДУРУСТИИ МИЛЛӢ-2023”
Санаҳои 1-ум ва 2-юми декабри соли 2023 дуюмин Конгресси байналмилалӣ дар мавзуи «Тандурустии миллӣ-2023» аз ҷониби Вазорати тандурустии Федератсияи Русия ва Фонди «Росконгресс» дар шаҳри Москва баргузор гардид. Мақсад аз ташкили Конгресси миллӣ ин дар шакли суҳбати озод баррасӣ намудани масъалаҳои мубрами ташкилӣ ва иқтисодиёт дар соҳаи тандурустӣ, пешниҳод намудани дастовардҳо ва табодули таҷриба дар татбиқи лоиҳаҳои муваффақгардида иборат буд.
Бо фармоиши Вазири тандурустӣ ва ҳифзи иҷтимоии аҳолии Ҷумҳурии Тоҷикистон муҳтарам Ҷамолиддин Абдуллозода ректори Донишгоҳи давлатии тиббии Хатлон д.и.т., профессор Убайдулло Қурбон дар Конгресси мазкур ба ҳайси намояндаи Вазорати тандурустӣ ва ҳифзи аҳолии Ҷумҳурии Тоҷикистон ширкат намуд.
Конгресс ду рӯз идома ёфта, пас аз паёмҳои видеоии Президенти Федератсияи Русия Владимир Владимирович Путин, сарвазири Федератсияи Русия Михаил Владимирович Мишустин ва паёмҳои табрикотии муовини сарвазири Федератсияи Русия-Татяна Алексеевна Голикова, муовини раиси Шӯрои федератсияи маҷлиси федералии Федератсияи Русия - Инна Юриевна Святенко, муовини раиси Думаи давлатии Маҷлиси федералии Федератсияи Русия - Анна Юриевна Кузнетсова ва баромади Вазири тандуруситии Федератсияи Русия - Михаил Албертович Мурашко, маъруза ва баромадҳо дар қисмати пленарӣ ва бахшҳои алоҳида шунида шуданд.
Ҳамчун намояндаи Тоҷикистон ректори Донишгоҳи давлатии тиббии Хатлон Убайдулло Қурбон дар рӯзи аввали чорабинии илмӣ дар бахшҳои «Навовариҳо дар соҳаи тандурустӣ: тадбирҳо оид ба дастгирии рушди инноватсияҳо ва имкониятҳои татбиқи босуръат дар асоси таҷрибаи Русия ва Чин» ва «Илми тиб дар сафи пеши соҳибихтиёрии технологии мамлакат» иштирок намуда, дар рӯзи дуюми Конгресс дар бахши «Захираҳои инсонӣ дар соҳаи тандурустӣ: роҳҳои нави ҳали мушкилоти мураккаб» оид ба «Масъалаҳои захиравии кадрӣ дар Ҷумҳурии Тоҷикистон» маъруза намуд.
Ҳамзамон, дар рӯзи охири Конгресс Ректори ДДТХ дар бахши «Маълумоти олии тиббӣ дар Русия: рушди устувор ва имкониятҳои нав» иштирок дошт, ки дар ин бахш масалаҳо оид ба омода намудани мутахассисон дар соҳаи тандурустӣ ва инчунин, баланд бардоштани нуфузи таҳсилоти тиббӣ дар Русия барои шаҳрвандон ва донишҷӯёни хориҷӣ мавриди баррасӣ қарор гирифта буданд.
Хабарнигори сомона.
ИШТИРОК ДАР СИМПОЗИУМИ БАЙНАЛМИЛАЛӢ БА ИФТИХОРИ 115-СОЛАГИИ АКАДЕМИК БОБОҶОН ҒАФУРОВ
5 декабр дар Кохи Ваҳдати пойтахт бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ифтихори 115-солагии академик Бобоҷон Ғафуров Симпозиуми байналмилалии “Бобоҷон Ғафуров - бузургтарин муҳаққиқ ва муаррифгари таърихи халқи точик”, баргузор гардид.
Кори ҳамоиши сатҳи баландро бо сухани муқаддимавӣ Президенти Академияи миллии илмҳои Ҷумҳурии Тоҷикистон Фарҳод Раҳимӣ ифтитоҳ карда, ба Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон сухан доданд.
Сарвари давлат муҳтарам Эмомалӣ Раҳмон, нахуст, мардуми шарифи Тоҷикистон, ҳамватанони бурунмарзӣ ва иштирокчиёни чорабиниро ба ифтихори 115-солагии фарзанди фарзонаи миллати тоҷик, ходими номдори давлативу сиёсӣ, Қаҳрамони Тоҷикистон академик Бобоҷон Ғафуров самимона табрик гуфтанд.
Президенти мамлакат муҳтарам Эмомалӣ Раҳмон саҳми аллома Бобоҷон Ғафуровро дар рушди иқтисодиву иҷтимоии Тоҷикистон, инкишофи илму фарҳанги муосири ҷумҳурӣ ва илми шарқшиносии асри ХХ бисёр муассир арзёбӣ карданд.
Таъкид гардид, ки Бобоҷон Ғафуров тамоми ҳаёт ва фаъолияти худро дар ҷодаи таҳқиқи анъанаҳои давлатдории тоҷикон, гузаштаи чандинҳазорсолаи миллати тоҷик, мақом ва ҷойгоҳи таърихии тоҷикон дар илму адаб ва фарҳангу тамаддуни башарӣ сарф намудааст.
Бинобар ин, барои фаъолияти барҷастаи давлатӣ ва хизматҳои бузург дар инкишофи илму фарҳанг, худшиносии миллӣ ва ифтихори ватандорӣ ба Бобоҷон Ғафуров 8-уми сентябри соли 1997 бо Фармони Президенти мамлакат унвони олии “Қаҳрамони Тоҷикистон” дода шуд.
Сарвари давлат муҳтарам Эмомалӣ Раҳмон баргузории ин чорабинии сатҳи баландро нишонаи олии қадршиносии роҳбарияти давлату Ҳукумати Ҷумҳурии Тоҷикистон барои хизматҳои арзандаи Бобоҷон Ғафуров дар назди халқу давлати тоҷик арзёбӣ карда, зимни суханронии пурмуҳтаво оид ба ҳаёти ибратомӯз ва фаъолияти самаранокаш дар роҳи муаррифии мардуми бофарҳангу тамаддунофари тоҷик дар арсаи олам андешаронӣ намуданд.
Аз ҷумла, таъкид гардид, ки Бобоҷон Ғафуров бо олимону адибон дар иртиботи доимӣ қарор дошт ва инкишофи илми Тоҷикистонро пайваста дастгирӣ, назорат ва роҳнамоӣ мекард.
Бобоҷон Ғафуров пас аз устод Садриддин Айнӣ ба таҳқиқи мукаммали таъриху тамаддуни тоҷикон иқдом намудааст. Ӯ дар марҳалаи нави рушди илму фарҳанги тоҷик риштаи тоҷикшиносиро густариш бахшид, ки аввалин падидаи дурахшони он эҷоди асари бунёдии “Таърихи мухтасари халқи тоҷик” мебошад.
Таъкид гардид, ки ҳадафи устод Бобоҷон Ғафуров аз нашри ин китоб ва асарҳои минбаъда ба ҷаҳониён собит намудани ин ҳақиқати илмӣ буд, ки тоҷикон яке аз қадимтарин миллатҳои дунё буда, дар раванди рушди тамаддуни башарӣ нақши басо арзишманди таърихӣ бозидаанд.
Президенти мамлакат муҳтарам Эмомалӣ Раҳмон зимни суханронӣ дар бораи аҳамияти шоҳасари “Тоҷикон”-и Бобоҷон Ғафуров андешаронӣ карда, иброз доштанд, ки “Тоҷикон” асарест, ки таърихи миллати тоҷикро аз замонҳои қадимтарин то ибтидои асри XX-ум дар бар мегирад ва дар заминаи маводи зиёди бостоншиносӣ, осори фаровони хаттии таърихиву адабӣ ва таҳқиқоти олимони маъруфи Шарқу Ғарб ба таври хеле муфассал таълиф шудааст. Дар ин асари безавол ҷараёни ташаккулёбии миллати тоҷик, рушди фарҳанги миллӣ ва ҳамзамон бо ин, лаҳзаҳои фоҷиабори ҳаёти мардуми мо ва қаҳрамониҳои таърихии фарзандони ҷоннисори он возеҳу равшан ва бо истифода аз сарчашмаҳои муътамади таърихӣ баён гардидаанд.
“Тоҷикон” ҳоло китоби рӯйимизии ҳар як фарди соҳибмаърифат ва бонангу номуси миллати тоҷик мебошад, зикр карданд Пешвои миллат муҳтарам Эмомалӣ Раҳмон.
Президенти мамлакат ба Ҳукумати кишвар супориш доданд, ки масъалаи таъсиси Ҷоизаи давлатии ба номи академик Бобоҷон Ғафуров барои дастовардҳои назаррас дар таҳқиқи таърихи халқи тоҷик, бостоншиносӣ, мардумшиносӣ, шарқшиносӣ ва муаррифии таъриху фарҳанги деринаи тоҷикон дар арсаи байналмилалиро омӯхта, пешниҳод манзур намояд.
Ҳамчунин, Пешвои миллат муҳтарам Эмомалӣ Раҳмон дастур доданд, ки ба хотири огоҳии ҳарчи бештари мардум аз таъриху фарҳанг ва тамаддуни аҷдодони хеш “Шоҳнома”-и безаволи Абулқосим Фирдавсӣ чоп ва ба тамоми мардуми кишвар дастрас карда шавад.
Сарвари давлат муҳтарам Эмомалӣ Раҳмон таъкид карданд, ки ҳадафи Ҳукумати Ҷумҳурии Тоҷикистон аз гиромидошт ва зинда нигоҳ доштани ному корномаи фарзандони бузурги миллати тоҷик ин аст, ки таърихи пурифтихор ва мероси пурбори илмӣ, адабӣ ва фарҳангиву тамаддунии худро соҳибӣ ва ҳимоя кунем, ин таърихи пурифтихор ва ин мероси гаронмояро ба хотири иттиҳоду сарҷамъӣ ва сарбаландиву сарфарозии мардумамон, ободии Ватани аҷдодиамон ва таҳкими пояҳои давлатдории навини миллиамон ҳарчи бештар ва оқилона истифода барем.
Баъди суханронии пурмуҳтавои Президенти мамлакат дар Симпозиуми байналмилалии “Бобоҷон Ғафуров - бузургтарин муҳаққиқ ва муаррифгари таърихи халқи точик” меҳмонони чорабинӣ, олимону коршиносони сатҳи байналмилалӣ Виталий Наумкин - академики Академияи илмҳои Русия, Сзин Сзэ - муовини директори Институти Аврупо, Русия ва Осиёи Марказии Академияи илмҳои Чин, Ҳасан Булхорӣ - устоди Донишгоҳи Теҳрон, Франсис Ришар - шарқшинос аз Франсия, Навшоҳи Ориф Доктори илми таърих аз Ҷумҳурии Исломии Покистон, Иброҳим Истамбулӣ - тарҷумони арабии китоби “Тоҷикон” аз Сурия ва Давлатзода Шоираи Кароматулло - донишҷӯи курси чоруми факултети таърихи Донишгоҳи миллии Тоҷикистон, барандаи Шоҳҷоизаи озмуни ҷумҳуриявии “Тоҷикон - оинаи таърихи миллат” суханронӣ карда, дар бораи хизматҳои арзандаи аллома Бобоҷон Ғафуров дар роҳи рушан намудани таърих ва пайдоши давлату миллати тоҷик ва қадршиносиҳои фарзандони фарзонаи миллат аз ҷониби Пешвои муаззами миллат муҳтарам Эмомалӣ Раҳмон андешаронӣ карданд.
05.12.2023 13:42, шаҳри Душанбе
БАРГУЗОРИИ ҶАЛАСАИ НАВБАТИИ ТАШКИЛОТИ “ҶАМЪИЯТИ МУТТАҲИДАИ ҶАРРОҲОНИ ҶУМҲУРИ ТОҶИКИСТОН” ДАР ДДТХ
Санаи 4-уми декабри соли 2023 дар толори Донишгоҳи давлатии тиббии Хатлон ҷаласаи навбатии ташкилоти “Ҷамъияти муттаҳидаи ҷарроҳони Ҷумҳури Тоҷикистон” баргузор гардид. Тибқи Рӯзномаи ҷаласа мавзуъҳои “Ҷарроҳии реконструктивии-пластикии дар шароити БҶК дар ноҳияи Данғара” аз ҷониби ассистенти кафедраи ҷарроҳии ДДТХ Дадоҷонов Ҷ.Ю., “Бартараф намудани аворизҳои баъди эктрипатсияи эндоскопии бачадон” аз тарафи мудири кафедраи ҷарроҳии №1-и ДДТХ, н.и.т., дотсент Пиров Б.С. ва “Намоиши беморони холедоходуоденоанастамози терминоалатералии оид ба холедолитиаз” аз тарафи намояндаи Беморхонаи клиникии вилояти Хатлон ба номи Б.Воҳидов -Ҳодиев Ш. мавриди баррасӣ ва таҳлил қарор дода шуданд. Аъзои ташкилоти мазкур вобаста ба мавзуъҳои баррасигардида бо маърузачиён саволу ҷавоб намуда, барои беҳтаршавии фаъолият ба маърузачиён тавсияҳои судманд доданд.
Раёсати ҷаласа барои дар сатҳи баланд доир намудани он дар Донишгоҳи давлатии тиббии Хатлон ба Роҳбарияти донишгоҳ изҳори сипос намуданд.
Дар фарҷоми ҷаласа дастагули созу суруди аъзои дастаи ҳунарии “Дурахшон” тақдими иштирокчиён гардонда шуд.
Хабарнигори сомона.
ЧОРАБИНӢ БАХШИДА БА РӮЗИ УМУМИҶАҲОНИИ МУБОРИЗА БАР ЗИДДИ ВНМО
Санаи 1-уми декабри соли 2023 тибқи нақша-чорабинии Раёсати донишгоҳ аз тарафи кафедраи Беҳдошт ва эпидемиология аксия ва ҳамоиши илмӣ бахшида ба Рӯзи умумиҷаҳонии мубориза бар зидди ВНМО баргузор карда шуд.
Бо мақсади гузаронидани корҳои фаҳмондаҳӣ ҷиҳати пешгирӣ аз сироятшавӣ бо бемории мазкур аз соати 7:00 аз тарафи омӯзгорони кафедра дар байни ҳайати профессорону омӯзгорон, кормандон ва донишҷӯёни донишгоҳ, ҳамзамон, дар маркази ноҳия байни аҳолӣ аксияи “Мубориза бар зидди ВНМО” баргузор карда шуд. Ба аҳолӣ варақаҳои иттилоотӣ, ки роҳҳои пешгирӣ аз беморӣ дар он дарҷ гардида буд, тақсим карда шуд.
Қисмати ҳамоиши илмӣ дар толори лексионии донишгоҳ, бо ишитроки ҲПО, донишҷӯён ва намояндагони Маркази мубориза бар зидди ВНМО дар ноҳияи Данғара, баргузор карда шуд. Аз тарафи мутахассисони соҳа, аз таърихи қайди ин сана, роҳҳои пешгирӣ аз беморӣ ва хавфу хатарҳои он бо факту далелҳо мушаххас, маърузаҳои пурмуҳтаво пешниҳод карда шуданд.
Кафедраи Беҳдошт ва эпидемиология.
МАҲФИЛИ «ҶАРРОҲОНИ МУОСИР»
Яке аз роҳҳои пешрафт ва баланд бардоштани сатҳи дониши донишҷӯён ин ташкил ва баргузор намудани маҳфилҳои илмӣ мебошад. Бо ин мақсад дар кафедраи бемориҷои ҷарроҳӣ маҳфили илмии “Ҷарроҳони муосир” таҳти роҳбарии мудири кафедра н.и.т. Холов А.Д. доир карда шуд. Маҳфил бо сухани ифтитоҳии мудири кафедра оғоз ёфта, сипас аз ҷониби аъзои маҳфил мавзуи “Илтиҳоби шадиди изофаи кирмшакл” бо баррасии муҳиммият, аломатҳои клиникӣ, усулҳои муосири ташхис, табобат ва оризаҳои илтиҳоби шадиди изофаи кирмшакл пешниҳоди ҳозирин гардонда шуд.
Барои беҳтар ба роҳ монда шудани маҳфил аъзои даста ба гурӯҳҳо ҷудо карда шуда, мудири кафедраи фанҳои ҷарроҳии №3 н.и.т., дотсент Айниев Б.С., мудири кафедраи бемориҳои ҷарроҳӣ Холов А.Д., сармутахасиси назорати сифати таълим Қурбонов Х.Ш. ба ҳайси ҳакамон фаъолияти гурӯҳҳоро баҳогузорӣ намуданд.
Дар охир саволҳо аз тарафи ҳакамон вобаста ба мавзуи илтиҳоби шадиди изофаи кирмшакл ба аъзои маҳфил пешниҳод гардид, ки ҳар як гурӯҳ бо ҷавоби аниқу дақиқ додан ба саволҳо омодагии ҳаматарфаи худро ба ин маҳфил нишон доданд.
Кафедраи бемориҳои ҷарроҳӣ
ҶАЛАСАИ НАВБАТИИ ШУРОИ ОЛИМОН
Санаи 25-уми ноябри соли 2023 ҷаласаи навбатии Шурои олимони донишгоҳ баргузор гардид. Нахуст Раиси Шурои олимон д.и.т., профессор Убайдулло Қурбон ҷаласаро ифтитоҳ намуда, аъзои Шурои олимонро бо рӯзнома шинос намуд. Тибқи рӯзномаи ҷаласа шахсони масъул аз фаъолияти корӣ маълумот пешниҳод намуданд.
Директори маркази таҳсилоти баъдаздипломӣ Қурбонов З.Қ. оид ба қабул ба зинаи ординатураи клиникӣ ва интернатураи клиникӣ, ҳамзамон, барномаҳои таҳсилоти баъдаздипломӣ маълумот пешниҳод намуда, аз дурнамои фаъолияти шуъба сухан кард.
Муовини ректор оид ба илм ва нашрия, н.и.т., дотсент Боронов Ҳ.А. дар бораи омодагӣ ба баргузории 4-умин Конференсияи ДДТХ, ки моҳи декабр дар назар дошта шудааст, маълумот дода, иброз дошт, ки айни ҳол корҳои омодагӣ дар ин самт хуб ба роҳ монда шудааст ва кушиш менамоем, ки конфронсро дар сатҳи баланд баргузор намоем.
Дар бораи фаъолияти Маркази симулятсионӣ, мушкилот ва дурнамои он Сарвари марказ Насруллоев Д. баромад намуда, нақши марказро дар ташаккул ва баланд бардоштани дониши амалии донишҷӯён қайд намуд.
Фаъолияти шуъбаи равобити байналмилалии донишгоҳ дар давоми соли 2023-ро сардори шуъба Назаров Р.И. баррасӣ намуда, оид ба иштироки ҲПО дар лоиҳаҳои байналмилалӣ, ҳамкориҳо бо шарикони рушд ва дигар масъалаҳои ба ин шуъба алоқаманд ибрози назар намуд.
Дар масъалаҳои гуногун як қатор Қарорҳои Шурои олимон баррасӣ ва тасдиқ гардида, ҳамзамон, мавзуъҳои дигари мубрами рӯз шунида шуданд.
Аз ҷониби Раиси Шурои олимон вобаста ба тамоми масъалаҳои баррасигардида ба масъулон ва сохторҳои дахлдор дастуру супоришҳои мушаххас дода шуд.
БАРНОМАИ ФАРҲАНГӢ БАХШИДА БА РӮЗИ ПАРЧАМИ ДАВЛАТӢ ДАР ДДТХ
Санаи 24-уми ноябри соли 2023 дар Донишгоҳи давлатии тиббии Хатлон маҷлиси тантанавӣ ва барномаи адабӣ-мусиқӣ бахшида ба Рӯзи Парчами давлатии Ҷумҳурии Тоҷикистон баргузор гардид. Ҷаласаро муовини ректор оид ба илм ва нашрия дотсент Боронов Ҳ.А. ҳусни оғоз бахшида, нутқи табрикотии Ректори донишгоҳ, профессор Убайдулло Қурбонро бахшида ба ин санаи муҳим қироат намуд.
Мудири кафедраи физиологияи нормалӣ ва патологӣ Назаров Ҷ.Т. перомуни “Парчами давлатӣ-ифтихори мост” маъруза пешниҳод намуда, аз ҷумла қайд намуд, ки ҳифзу нигаҳдории ҳамешагии муқаддасоти миллӣ аз вазифаҷои аввалиндараҷаи ҳар як шаҳрванд ба шумор меравад.
Сипас аз ҷониби дастаи ҳунарии “Дурахшон”-и донишгоҳ бахшида ба ҷашн суруду тарона ва рақсҳои мавзун пешкаш карда шуд, ки хотири ҳозиринро болида гардонид.
Шуъбаи тарбия ва фарҳанг,
кафедраи физиологияи нормалӣ ва патологӣ.
РАҲПАЙМОИИ ҲПО, КОРМАНДОН ВА ДОНИШҶӮЁНИ ДДТХ БАХШИДА БА РӮЗИ ПАРЧАМ
Санаи 24-уми ноябри соли 2023 тибқи нақшаи мақомоти иҷроияи ҳокимияти давлатии ноҳияи Данғара бахшида ба Рӯзи Парчами давлатии Ҷумҳурии Тоҷикистон раҳпаймоии тамоми кормандони идораву муассисаҳо доир карда шуд. Донишгоҳи давлатии тиббии Хатлон низ дар ин маъракаи муҳимми сиёсӣ бо дарки масъулият фаъолона ширкат варзид. Роҳбарияти донишгоҳ, ҳайати профессорону омӯзгорон ва донишҷӯён бо ифтихор аз ватану сулҳу осоиштагӣ бо баланд бардоштани Парчами давлатӣ ба роҳпаймоӣ баромаданд. Сипас дар толори барҳавои Қасри фарҳанг дар барномаи театркунонидашудаи аҳли фарҳанги ноҳия ширкат варзида, аз барномаи фарҳангии бошукуҳ бархӯрдор гардиданд.
Хабарнигори сомона.
