Маълумоти умумӣ дар бораи факултетҳо

ДДТХ дорои 3 факултет мебошад... интихоби дуруст намоед!
  • Тиббӣ
  • 150 ҷой 80 ҷои шартномавӣ
  • 8010 сомонӣ
  • пардохти маблағи яксолаи таҳсил барои гурӯҳи шартномавии факултети тиббӣ
  • Мӯҳлати таҳсил 6 сол
  • 38 ихтисос
  • Муфассал
  • Педиатрӣ
  • 150 ҷой 80 ҷои шартномавӣ
  • 6400 сомонӣ
  • пардохти маблағи яксолаи таҳсил барои гурӯҳи шартномавии факултети педиатрӣ
  • Мӯҳлати таҳсил 6 сол
  • 38 ихтисос
  • Муфассал
  • Стоматологӣ
  • 50 ҷои шартномавӣ
  • 9040 сомонӣ
  • пардохти маблағи яксолаи таҳсил барои гуруҳҳи шартномавии факултети стоматологӣ
  • Мӯҳлати таҳсил 5 сол
  • 10 ихтисос
  • Муфассал
Хабарҳои мо
хабар, эълон, гузориш аз баргузории чорабиниву ҷамъомадҳо ва дигар маводҳои иттилоотии донишгоҳи давлатии тиббии Хатлон

     

       Бо ташаббуси раёсат ва Клуби сайёҳии Донишгоҳи давлатии тиббии Хатлон рӯзҳои 17-20-уми июли соли 2017 дар доираи лагери истироҳатию таълимӣ сайёҳати як гурӯҳ кормандон ва донишҷӯён ба Сари Хосори ноҳияи Балҷувон ташкил карда шуд. Бист нафар донишҷӯён ва сардори клуби сайёҳӣ муовини ректор оид ба корҳои хоҷагӣ Аҳадов Ш.Ф., сардори шуъбаи таълим Қузибоева Н.К., мудири кафедраи ҷомеашиносӣ Гулов А.А., мудири кафедраи физикаи тиббӣ ва информатика, дотсент Ситамов С., дотсент дотсенти кафедраи забонҳо Должикова В.А., муовини декани факултетҳо Камолов С.А., корманди шуъбаи технологии донишгоҳ Отахонов Р.Х., муаллими калони кафедраи забонҳо Одинаев С.П. ба ин сайёҳат шомил буданд. Субҳи 17-уми июн корвони сайёҳон роҳ ба сӯи ноҳияи Балҷувон гирифт. Чун ба ноҳияи Балҷувон расидем,  дар назди оромгоҳи Ҳазрати Шоҳ Неъматуллоҳи Валӣ, ки яке аз ҷойҳои таърихии ноҳия ба шумор меравад, ҷамъ омадем.

Тавассути нақлиёт ба роҳҳои душворгузар ва қариб бероҳаи қад-қади соҳили дарё озими Сари Хосор шудем. Манзараҳои дилфиреби кӯҳҳои осмонбӯс, деҳоти сари роҳ нороҳатию мушкилоти сафарро бароямон сон менамуд. Аз оби чашмаҳои серуну шифобахши қад-қади роҳ ошомида, шукри чунин обҳои тозаю мусаффоро менамудем ва бори дигар моҳияти иқдоми Пешвои миллат, Асосгузори сулҳу ваҳдати миллӣ, Президенти Ҷумҳурии Тоҷикистон муҳтарам Эмомалӣ Раҳмонро нисбати «Даҳсолаи амал: об барои рушди устувор» дарк менамудем.

      Дар Сари Хосор наздикии Базаи туристӣ дар ҳамвории дараи хушманзаре хаймаҳои худро устувор намудем. Аз чеҳраи шодон ва кӯшишу ғайрати ҳам донишҷӯёну ҳам кормандон баръало эҳсос карда мешуд, ки ин сафар барояшон хеле мақбулу хотирмон хоҳад шуд. Шабона дар атрофи гулхани фурӯзон ҷамъ омадану сӯҳбат, рақсу шодмонӣ намудан кайфияти тасвирнопазире дошт.

     Рӯзи дуюм аз осорхонаи таърихии Сари Хосор, Маркази байналмиллалии солимгардони кӯдакони гирифтори фалаҷи модарзод дидан намудем. Дар доманаи кӯҳи назди деҳот як ҷойи аҷибе ҳаст, ки мувофиқи эътиқоди сокинон сангчаи партофтаи ҳар нафаре агар чуқурчаи начандон ҳамвори доманаи кӯҳ қарор гирад, орзую омолҳояш ҷомаи амал мепӯшанд.

     Рӯзи дигар аз шаршараҳои дилфиребе, ки аксашонро дао телевизион борҳо дида будем, ҳалвати аҷибе ҳосил намудем. Тамошои ин гӯшаи зебои табиат он қадар таассуроте дошт, ки донишҷӯён худро ба шавқу суруд зери оби сарди шаршараҳо мегирифтанду аз тамоман тар шудани сару либоси худ парвое надоштанд. Беихтиёр мисраъҳои шоири зиндаёд Лоиқ Шералӣ ба хотирам омад:

Боз рӯи сабзаҳо афтону хезон по ниҳам,

Кӯҳҳову даштҳоро дар дили худ ҷо диҳам.

Лек одам ҳар қадар солору пурармон шавад,

Боз мехоҳад, ки боре кӯдаки нодон шавад...

      Баъди нисфирӯзӣ аз лойи шифобахши Оби гугирд дидан намудем. Донишҷӯён ин лойи шифобахш ба бадани худ молида, аз бӯи андаке нофорами он ҳам парвое надоштанд. Гаштаю баргашта оид ба хусусиятҳои шифобахшии он саволҳо медоданд.

 

      Рӯзи охирини ин сайёҳати дилфиребро бо ҷамъоварии гиёҳҳои шифобахши мавзеву дараҳои наздикии қароргоҳ сипарӣ намудем.

Дар бозгашт ба сӯи ноҳияи Данғара зери лаб замзама менамудам:

Ёд бодо ҳама он манзараҳо,

Ёд бодо ҳама он хотираҳо.

Ёд аз домани Сарихосор,

Ёд аз замзамаи шаршараҳо!

 

Одинаев С.П. – устоди кафедраи забонҳои ДДТХ.

      Дар таърихи 03 – юми августи  соли 2017 дар толори маҷлисии ДДТХ,  ҷиҳати иҷрои Амри Президенти Ҷумҳурии Тоҷикистон аз 15  сентябри соли 2011, таҳти  №АП – 1729 «Дар бораи баргузор намудани нишасти матбуотӣ бо васоити ахбори оммаи кишвар»,  нишасти матбуотиро доир намуд.

       Лозим ба қайд аст, ки дар нишасти матбуотӣ намояндагони ВАО, рӯзноманигорони соҳибкасби вилояти Хатлон ба монанди,  Билоли Шамс аз рӯзномаи «Азия плюс», Муродов З. намояндаи   рӯзномаи «Ҷумҳурият», Сотиев М аз рӯзномаи «Новый Хатлон», Сафарова Х. аз рӯзномаи «Хатлон», Маҳинов М.аз рӯзномаи «Садои Данғара», Одинаев С.– «Пайки Шифо» ва ҳайати роҳбарикунандаи Донишгоҳи тиббӣ иштирок доштанд.

      Дар муқаддима  аз ҷониби ректори донишгоҳ, д.и.т., профессор У. Қурбон нисбат ба ҳамаи самтҳои фаъолият,  дастовардҳои назаррас ва проблеммаҳои дар Донишгоҳ ҷойдошта,  дар  шаш моҳи соли 2017 ва ҳамзамон доир ба корҳои анҷомёфта дар марҳилаҳои таъсисёбии ДДТХ ба аҳли нишаст  маълумоти муфассал пешниҳод карда шуд.

          Сипас, аз тарафи рӯзноманигорон ба ректори донишгоҳ У..Қурбон  оид ба  шароитҳои таълиму тарбия, ҳолати  маишии донишҷӯёну омӯзгорон, теъдоди қабули донишҷӯён барои соли таҳсили  2017 - 2018, норасоии мутахассисон дар самтҳои гуногуни соҳа, сатҳи касбияти ҳайати профессорону омӯзгорони донишгоҳ, корҳои сохтмонии иншоотҳои ДДТХ,  робита ва ҳамкориҳои роҳбарияти донишгоҳ бо беморхонаҳои ноҳияи Данғара, дар бораи фаъолияти  муолиҷавии  ҳайати профессорону омӯзгорони тахасусӣ дар беморхонаҳо, оид ба маблағгузории донишгоҳ аз ҷониби Ҳукумати мамлакат, заминаи моддӣ –техникии донишгоҳ,  инчунин  оид ба дастовардҳо ва тадбирҳои ҳавасмандкунии  омӯзгорони ҷавон ва ғайра  саволҳо  пешниҳод  шуданд. Ба саволҳои намояндагони ВАО   аз ҷониби  роҳбари Донишгоҳ ва аъзои раёсат, ҷавобҳои мушаххас пешниҳод  карда шуд.

         Дар охир аз ҷониби профессор У. Қурбон барои фаъолияти пурмасъули рӯзноманигорон комёбиву муваффақият таманно намуда, ҳамзамон доир ба роҳ мондани  ҳамкориҳои судманд ва муфидро бо васоити ахбори омма, дар шароити рушдёбии ҷаҳони иттилоот барои ДДТХ  ҳамчун падидаи нек арзёбӣ намуд.

 

Шуъбаи таҳлил, назорат ва робита бо ҷомеа

Дар сатҳи хуб ва сифати баланд ҷараён доштани фаъолияти илмиву амалӣ аз ҷониби кормандони Донишгоҳи давлатии  тиббии Хатлон далели возеҳи он  аст, ки ректор Убайдулло Қурбон  омили дар сарлавҳа зикршударо доро аст

Дар зиндагӣ кам нафаронеро дучор шудан мумкин аст, ки тамоми хислатҳои накӯи инсонӣ дар вуҷудашон тавъам афтода ва эшон дар рафтору гуфтор ва кирдор ин хислатҳоро бо риояи назокати хос мавриди корбурд қарор диҳанд.  Хушбахтона, дар ҷомеаи мо ҳастанд нафароне, ки хизмат ба миллату садоқат ба Пешвои миллат маънии зиндагӣ, қонун, поквиҷдонӣ ва  масъулиятшиносӣ меҳвари фаъолияташон маҳсуб шуда,  сарфи назар аз он ки дар кадом маснад ифои вазифа доранд, ба қавлу амали худ устувор ва дар ин собитқадаманд.  Доктори илмҳои тиб, профессор Убайдулло Қурбон аз зумраи чунин нафарон буда, баҳогузории ман доир ба ин шахсият  «самара»-и омилҳои «таҳрикбахш»-у «ҳавасмандкунанда» набуда, маҳсули мушоҳидаҳои чандинсола ва  муқоиса  маҳсуб шуда, аз чашмаи меҳру ихлос ва садоқату самимият об хӯрдааст. Давоми чанд соле ки номбурдаро мешиносаму ба қавли Рӯдакии бузургвор «омӯхтамаш ошкору пинҳонӣ» набуд мавриде, ки ин баҳогузорӣ зери суол рафта бошад.  Банда солиёни зиёд аст ин нафарро мешиносам ва аз ҳамнишинӣ бо онҳо ифтихор дорам, вале ин омил ба ҳеҷ ваҷҳ сабаби асосии ин навбат рӯйи саҳфа омадани ин чанд сатр доир ба фаъолияташ дар мақому кунунӣ – ректори Донишгоҳи давлатии тиббии Хатлон  нест. Омили асосии таҳрикбахшандаи иншои маводи мазкур  сатҳи баланди касбияти номбурда, муаррифии шоиста ба сифати вориси Синои бузургвор аз илми тибби тоҷик дар арсаи байналмилалӣ, муҳимияти корҳои тадқиқотии басомонрасида, ҳисси баланди меҳандӯстӣ ва масъулиятшиносиву поквиҷдониаш  маҳсуб меёбад. Фаъолияти пурмаҳсули Убайдулло Қурбон минҳайси ректори муассисаи таҳсилоти олии касбии навтаъсис – Донишгоҳи давлатии тиббии Хатлон собит намуд, ки ӯ воқеан «фиристодаи доно»-и  Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон буда, дар як муддати кӯтоҳ бо масъулиятшиносӣ, серталабӣ, кордонӣ ва поквиҷдониаш дастуру супоришҳои Пешвои муаззами миллат муҳтарам Эмомалӣ Раҳмонро сари вақт, дар  сатҳи хуб ва сифати баланд иҷро намуда истодааст. Аслан Убайдулло Қурбон дар ҳар ҷое фаъолият кардааст, аз худ номи нек ва ободокориҳои зиёд боқӣ мондааст. Оғоз бахшидани марҳилаи сифатан нави фаъолияти Донишгоҳи давлатии тиббии Тоҷикистон ба номи Абӯалӣ ибни Сино, эҳёи боварии довталабон ба шаффофияти маъракаи қабул, ба дараҷаи қобили мулоҳиза пурқувват намудани пойгоҳи техники ин муассисиаи таҳсилоти олии касбӣ, афзоиши бесобиқаи ҷойҳои нишаст ва масоҳати таълимии донишгоҳ, бо дастгирии Пешвои миллат бозпас гирифтани хобгоҳҳое, ки дар ихтиёри дигар ташкилоту муассисаҳо қарор доштанд, аз ҷамъи дастовардҳои замони роҳбарии Убайдулло Қурбон «муште аз хирвор» аст.  Агар гӯям, ки номи профессор Убайдулло Қурбонов ба таври абадӣ дар саҳфаҳои таърихи Донишгоҳи давлатии тиббии Тоҷикистон ба номи Абӯалӣ ибни Сино бо ҳарфҳои заррин сабт шудааст, муболиға нахоҳад буд. Зеро, маҳз замони роҳбарии ӯ марҳилаи сифатан нави тараққиёти ин муассисаи таҳсилоти олии касбӣ шуруъ гаштаву дар ин замина дар тамоми самтҳо пешравиҳои назаррас рӯйи кор омаданд. Вале, дастоварди асосии профессор Убайдулло Қурбонов ба андешаи ман, эҳё намудани боварии шаҳрвандон ба шаффофияти маъракаи қабули довталабон ба донишгоҳ маҳсуб меёбад. Банда шояд ягона журналисте будам, ки борҳо бобати мавҷудияти комили шаффофияти маъракаи қабул дар ДДТТ ба номи Абӯалӣ ибни Сино навиштаам ва аз ин нуқтаи назар мухотаби эроди баъзе «дӯстон» низ будам. Зеро, дар ибтидо на ҳама ба воқеияти ин раванд эътимод доштанд. Ифтихор аз он дорам, ки дар як муддати кӯтоҳ эътимоди шаҳрвандон  бобати бо дониши худ дохил шудан ба донишгоҳе, ки роҳбариашро Убайдулло Қурбонов ба зимма дошт, бамаротиб афзуду аҳли ҷомеа ба поквиҷдониву масъулиятшиносии мавсуф муътақид гардиданд.   

 Фаъолияти  илмиву амалии ин табиби масеҳонафас дар мисоли шифои комил ёфтани шумораи зиёди беморон баръалост ва мақоли халқии «чизе, ки аён аст, ҳоҷат ба баён нест» - ро ба ёд меорад. Мисолҳои зиёде мавҷуданд, ки ба шарофати номбурда , теъдоди зиёди инсонҳо, ки бо сабабҳои гуногун қисме аз баданашон осеб дидаасту дар зиндагӣ ба ноҷӯриҳои зиёд мувоҷеҳ буданд, ба зиндагӣ дилгарм шуданд.Ҳамрадиф бо ин, мақолаҳои илмии Убайдулло Қурбон, ки фарогири  масоили гуногуни бахши ҷарроҳии реконструктивӣ ва пластикӣ мебошад, на танҳо дар маҷаллаҳои илмии дохили кишвар, балки дар маҷаллаҳои бонуфузи хориҷи мамлакат низ ба нашр расидаанд. Бегуфтугӯ, тадқиқотҳои илмии Убайдулло Қурбон  аҳамияти байналмилалӣ дорад. Қисмати аъзами силсилаи корҳои илмиро раванди ҷарроҳии реконструктивии осебҳои дар ҳолатҳои гуногун бавуҷудомада, бандаки рагу асаб ва контрактураи ангуштон ва мафсали дасту пойҳо пас аз сӯхтан  ва ғайраро дар бар гирифтааст.

Нуктаи муҳим он аст, ки баъзе ҷарроҳиҳои ин бахш дар тибби ҷаҳонӣ назир надошта, маротибаи аввал аз ҷониби Убайдулло Қурбонов ва ҳамсафони ӯ  дар сатҳу сифати баланд иҷро шудаанд.

Дар  силсилаи корҳои илмии Убайдуло Қурбон намудҳои гуногуни нуқсонҳои бофтаҳои рӯпушкунандаи мавзеъҳои муйдори сар, ҳолатҳои нуқсони модарзодӣ ва осеб дидани суфраи гӯш, осеби чашмон, бофтаҳои рӯпушкунандаи пошнаи пой, кӯчонидани флапи кафи пой, гузоштани анастамозҳои тестикулоимакалии варидӣ, бартарафсозии нуқсони бинӣ, табобати астмаи бронхиалӣ ва ғайра  омӯзишу гурӯҳбандӣ шуда,ҳамзамон усулҳои нави ба воситаи ҷарроҳӣ рафъ намудани онҳо мавриди истифода қарор гирифтаанд. Ин бори дигар собит менамояд, ки илми Убайдулло Қурбон  ба амалаш ёр шуда, барои таҳияи усулҳои нави ҷарроҳӣ ва такмили усулҳои мавҷуда ба даст овардани  ихтироотҳо  ва  пешниҳоди навоварии зиёд далели бебаҳси дурустии хулосаи мо доир ба масълаи мавриди назар аст.  Барои он ки хонандагони закӣ андешаҳои бандаро чун умумигӯӣ қабул накунанд бамаврид медонам мисол орам. Панҷуми январи соли 2010 дар шуъбаи микроҷарроҳии реконструктивӣ ва пластикии Маркази ҷумҳуриявии илмии ҷарроҳии дилу раг ва қафаси сина бо роҳбарии доктори илмҳои тиб, профессор Убайдулло Қурбон бори аввал усули пайванди ғайриозоди флапи параскапулярис ба мавзеи осебдидаи бофтаҳои сатҳи пеши гардан бомуваффақият амалӣ гардид. Пайванди ғайриозод ин кӯчонидани ин ё он қисмати бадани инсон (флап) бидуни буридани рагу пайвандҳо мебошад, зеро дар заминаи ин усул рагу пайванд бидуни буридан ба мавзеи осебдида гузаронида мешавад. Табиист, ки дар ин ҳолат самаранокии ҷарроҳӣ бамаротиб  беҳтару хубтар аст.

Ҷарроҳии зикршуда маротибаи аввал дар бемори 21- сола, ки дар натиҷаи сӯхтани бадан қисмати пеши гардан ва қафаси синааш осеби ҷиддӣ дидааст, гузаронида шуд. Истеъдоди нодир ва меҳнати пурмаҳсули табибон замина фароҳам овард, ки барои пайванди ғайриозод аз шонаи бемор флапи параскапулярис гирифта, рагу пайвандҳои он бидуни буридан тавассути таги каш ба мавзеи осебдида гузаронида шавад. Чунин усул натиҷаи хуб ба бор оварда, дар муддати кӯтоҳ мавзеи осебдида барқарор гашт. Аз он ки дар таҷрибаи ҷаҳонии микроҷарроҳии реконструктивӣ ва пластикӣ ин усул маротибаи аввал аст, метавон онро ба сифати дастоварди беназири табибони тоҷик ва ба маротиб болоравии обруи тибби тоҷик дар арсаи байналмилалӣ арзёбӣ намуд.

Таҷрибаи ҷаҳонӣ гувоҳ аст, ки зимни ҷарроҳии пайванди озод дар бисёр маврид самараи он қаноатбахш набуд ва он аслан аз натиҷаи буридану кӯчонидан ва тавассути анастомоз пайваст намудани рагу пайвандҳо вобастагии мустақим дошт. Дар усули ҷадиди ҷарроҳии пайванди ғайриозод, ки аз ҷониби Убайдулло Қурбон ва ҳамсафонаш таҳия гаштааст, зарурат ба буридану пайвастани рагу пайвандҳо нест ва маҳз аз ин ҷиҳат хавфи ҷарроҳӣ аз байн рафта, сатҳу сифаташ низ бамаротиб беҳтар аст. То ин замон чунин усули ҷарроҳӣ дар нафарони зиёд  анҷом дода шуда, ҳамаашон аз натиҷаи ҷарроҳӣ қаноатманданд.

 Лозим ба ёдоварист, ки соли 2010 аввалин маротиба дар ҷумҳурӣ аутотрансплантатсияи мӯйи сар тариқи трансплантатсияи фолликулярии пайвастагиҳо низ аз ҷониби Убайдулло Қурбон ва шогирдонаш сурат гирифта буд. Агар ин амалиётро низ таври сода бозгӯйӣ намоем, он тариқи ҷарроҳӣ якҷоя бо решааш аз як мавзеъ гирифтану ба қисмати бемӯй кӯчат намудани мӯйи сари инсон аст.

           Шахсони зиёдеро медонам, ки баъд аз соҳибмансаб гардиданашон кори илмиро канор гузоштаанд, вале Убайдулло Қурбонов бо вуҷуди ба зиммааш вогузор будани масъулияти бузург, ҳаргиз ба пешаи табибӣ ва кори илмӣ муносибати дуюмдараҷа накардааст. Ҳамасола аз ҷониби номбурда бомуваффақият анҷом ёфтани  беш аз 500 ҷарроҳиҳои  гуногун ва душвор, ки қисме аз онҳо дар таҷрибаи тибби ҷаҳонӣ назир надоранд, ба чоп расонидани  6 китобу 6 монография, зиёда аз 350 мақолаҳои илмӣ, зери роҳбариаш ҳимоя гардидани 12 рисолаи номзадӣ, соҳиби 15 патент, зиёда аз 70 пешниҳоди навоварӣ барои ихтироот будан ва ғайра бозгӯйи фаъолияти пурмаҳсули ӯст.  Дар матлаби мазкур меҳвар фаъолияти табобатии Убайдуло Қурбон ва ҳамкорони ӯ  дар  ноҳияи Данғара маҳсуб мешавад. Ёдовар мешавем, ки чанде қабл бо Қарори Ҳукумати ҷумҳурӣ Муассисаи давлатии  таълимии «Донишгоҳи давлатии тиббии Хатлон»  таъсис ёфт. Иқдоми мазкур ҷиҳати иҷрои  дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ шуда, хеле муҳим, саривақтӣ ва заруру ногузир маҳсуб мешавад. Дар Паём, аз ҷумла, супориш дода шуд, ки барои қонеъ намудани талаботи рӯзафзуни мардуми Тоҷикистон бо табибони баландихтисос дар вилояти Хатлон, ки сераҳолитарин минтақаи мамлакат аст, муассисаи таҳсилоти олии тиббӣ таъсис дода шавад. Далелу арқоми мавҷуда аз он шаҳодат медиҳанд, ки норасоии табибони дорои таҳсилоти олии касбӣ, бахусус дар вилояти Хатлон, ки аҳолиаш ба зиёда аз 3,5 миллион нафар расидааст, яке аз мушкилоти асоситарини ин соҳаи кишвар ба шумор меравад.

 Тавре аз маълумоти оморӣ бармеояд, ҳар сол Донишгоҳи давлатии тиббии Тоҷикистон ба номи Абӯалӣ ибни Синоро зиёда аз 1200 нафар мутахассис хатм мекунад. Аз 100 то 150 нафари дигар дар муассисаҳои таҳсилоти олии тиббии хориҷи кишвар соҳиби дипломҳои ин соҳа мегарданд, вале ин шумора талаботи рӯзафзуни кишварро ба табибони баландихтисос қонеъ карда наметавонад.

 Гузашта аз ин, шумораи умумии аҳолии Тоҷикистон ҳар сол ба ҳисоби миёна беш аз 2,5 фоиз афзоиш меёбад. Аз ин сабаб, ҳоло ба ҳар 10 ҳазор нафари аҳолии Тоҷикистон 21 табиб рост меояд, ки хеле кам аст. Маҳз норасоӣ ва шумораи аз ҳама ками табибони касбӣ дар вилояти Хатлон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро водор намуд, ки бо қарори Ҳукумати Ҷумҳурии Тоҷикистон Муассисаи давлатии таълимии «Донишгоҳи давлатии тиббии Хатлон»-ро таъсис диҳад. 

Дар баробари ба роҳ монда шудани фаъолияти таълимиву тарбиявӣ ва илмии ин донишгоҳи навтаъсис,  Пешвои миллат супориш дода буданд, ки роҳбарият ва кормандони донишогоҳ дар ҳамкорӣ бо пизишкони маҳаллӣ фаъолияти табобатиро низ дар сатҳи хубу сифати баланд ва таври густурда ба роҳ монанд. Тибқи иттилои дастрасшуда аҳли Донишгоҳи тиббии Хатлон дар ин ҷода собитқадам буда, нишондиҳандаҳо дар ҳама ҷанбаҳо қобили мулоҳиза ва арзандаи ситоиш мебошанд. Далел меорам:  Дар давоми аз моҳи марти соли 2016 то индам  таҳти роҳбарии ректори донишгоҳ профессор Убайдулло Қурбон  кормандони донишгоҳ А. Камолов ва Ҷ. Дадоҷонов дар Беморхонаи ҷумҳуриявии клиникии ноҳияи Данғара  дар зиёда аз 300 мариз амалиёти ҷарроҳӣ гузарониданд.

Лозим ба қайд аст, ки ин нафарон тавонистанд аз рӯи 34 намуд (спектор) дар маризон амалиётҳои ҷарроҳиро гузаронанд.  Бисёре аз ин намуди амалиётҳои ҷарроҳӣ дар шароити беморхонаи ноҳиявӣ ва дар таърихи он аввалин маротиба роҳандозӣ шудааст.  

           Ҷоиз ба зикр аст, ки шумораи  зиёди беморонро сокинони ноҳияи Данғара (218-нафар) ташкил медиҳанд.  Аз дигар навоҳии вилояти  Хатлон 74 –  нафар,  шаҳри  Душанбе ва НТМ –24  ва аз вилояти Суғд 6 - бемор  ҷарроҳӣ шуданд.

          Агар ҷарроҳии амалишударо гурӯҳбандӣ намоем, пас дар 71 маврид бемороне, ки дар натиҷаи садама ё осеби миёнадевори бинӣ ё устухонҳои бинӣ шикаста каҷ шудаанд ва мушкилии нафаскашӣ доранд ҷарроҳӣ  бо нишондодӣ эстетикӣ ва омехта, яъне тиббӣ ва эстетикӣ гузаронида шуд. Аз ин шумора дар 2 ҳолат, ки ҳам деформатсияи бинӣ ва скару ассиметрияи лаби боло (лабчокии модарзодӣ) ҷой дошт, 2-амалиёти ҷарроҳӣ-хейлопластика ва ринопластика дар як вақт гузаронида шуд.

Дар 6 бемор, ки аз барҷастагии суфраи гӯшҳо шикоят намуданд, амалиёти ҷарроҳии оттопластикаи дутарафа  ва дар 16 нафар, ки контрактураҳои пас аз сухтаи мафсалҳои андомҳои калон ва панҷаи дасту пой доштанд, амалиётҳои ҷарроҳӣ ҷиҳати  бартараф  намудани контрактураҳо бо усулҳои гуногун гузаронида шуд.

Ба ғайр аз ин, халтазании пилкҳои болоӣ ва поёнӣ дар шаш бемор,    бурида гирифтани кистаҳои тухмдон, бастани найчаи бачадон ва пластикаи девори пеши шикам бо технологияи абдоминопластика дар 4 бемор,  ҷарроҳии ҳерниотомия ва тармими деворҳои қадкашак дар 9 бемор бомуваффақият гузаронида шуд.

Ҳамрадиф бо ин, дар 29 ҳолат  амалиётҳои ҷарроҳӣ,  ба монанди флебэктомия, амалиётҳои ҳерниопластика, фаровардани тухми мардона ба тухмдон, бурида гирифтани кистаҳои мавзеҳои гуногун, коррексияи скарҳои мавзеи рӯй, резексияи мушаки стерноклейдомастоидеус, бурида гирифтани қабурғаҳои иловагӣ, кистаи гардан, халазиони пилки поёнии чашм, дакриосисториностомия гузаронида шуд.  Ҷоиз ба зикри алоҳида аст, ки кулли амалиёти зикршуда бо истифода аз технологияи претсизионӣ иҷро карда шуд.

Дар баробари фаъолияти гуруҳи ҷарроҳон дар ин давра бо мақсади  гузоштани заминаҳои мусоид барои кафедраҳои клиникӣ дар ояндаи наздик    корманди дигари  донишгоҳ  -  сардори шуъбаи таълим, номзади илмҳои тиб, дотсент, табиб - педиатр Н. Кузибоева дар шуъбаи ташхису табобатии Беморхонаи ҷумхуриявии ноҳияи Данғара низ шоистаи зикр аст. Дар давоми фаъолияти як солаи худ дар беморхона  2430 кӯдакони беморро  муоина, ташхис ва табобат намудааст.  Аз ҷониби  корманди дигари донишгоҳ номзади илми тиб, ассистенти кафедраи антомия ва гистология Сайфуддинова Ф. дар бахши бемориҳои занона ҳам назар буда дар ин давра аз ҷониби ин табиби ҷавон беш аз 300 нафар занон ташхису муолиҷа шудаанд.

 

Ин буд шаммае аз фаъолияти густурдаи роҳбарияти Донишгоҳи давлатии тиббии Хатлон ҷиҳати ҳифзи саломатии сокинони минтақа. Роҳбарияти донишгоҳ ба маъмурияти Беморхонаи ҷумҳуриявии клиникии Данғара ҷиҳати фароҳам овардани шароити муносиб ба гурӯҳи табибони микроҷарроҳ, ки ба аҳолии ноҳияи Данғара ва дигар шаҳру навоҳии вилоят хизмати тиббии   ройгон мерасонанд, арзи сипос намуда, тасмим доранд чунин ҳамкориро бо дигар беморхонаҳои вилояти Хатлон  низ ба роҳ монанд.

 

  

Далер МЕРГАНОВ,

узви Конфедератсияи байналмилалии иттифоқҳои журналистон

         Қоидаҳои қабули ҳуҷҷатҳои донишҷӯён ба Донишгоҳи давлатии тиббии Хатлон (минбаъд ДДТХ) дар асоси Қонуни Ҷумҳурии Тоҷикистон «Дар бораи маориф», Қонуни Ҷумҳурии Тоҷикистон «Дар бораи таҳсилоти олии касбӣ ва таҳсилоти касбии баъд аз муассисаи олии таълимӣ», «Қоидаҳои қабули донишҷӯён ба муассисаҳои таҳсилоти олии касбии Ҷумҳурии Тоҷикистон дар соли таҳсили 2017-2018», Низомномаи намунавии муассисаҳои таҳсилоти олии касбии Ҷумҳурии Тоҷикистон», Оинномаи Донишгоҳи давлатии тиббии Хатлон  таҳия шудааст.

       Ба курси якуми ҳамаи факултетҳои ДДТХ шаҳрвандони Ҷумҳурии Тоҷикистон қабул мешаванд, ки шаҳодатномаи намунаи давлатии таҳсилоти миёнаи умумӣ, дипломи намунаи давлатии таҳсилоти ибтидоии касбӣ, ки дар он гирифтани таҳсилоти миёнаи умумӣ қайд шудааст ва инчунин дипломи намунаи давлатии таҳсилоти миёнаи касбӣ доранд.

       Дар ДДТХ омодасозии мутахассисон аз ҷумлаи шаҳрвандони Тоҷикистон ба тариқи буҷавӣ ва шартномавӣ амалӣ мегардад.  Пардохти музди яксолаи таҳсил барои гуруҳҳи шартномавии факултети тиббӣ – 7700 сомонӣ, стоматологӣ – 8690 сомонӣ ва педиатрӣ  - 6160 сомониро ташкил медиҳад.

       Шаҳрвандони давлатҳои хориҷӣ,  инчунин хориҷиёну шахсони бетабааи муқими Ҷумҳурии Тоҷикистон ба ДДТХ  мувофиқи шартномаву созишномаҳои байнидавлатӣ фақат аз тариқи шартномавӣ дар сурати доштани ҳуҷҷати баробарэътирофии таҳсилот, тариқи озмун (суҳбат) ва пас аз пардохти музди таълим қабул карда мешаванд.  

         Қабули шаҳрвандони Тоҷикистон ва давлатҳои хориҷӣ ба ДДТХ ба барои гирифтани таҳсилоти дуюми олӣ танҳо дар асоси шартнома (пулакӣ) сурат мегирад.     

        Таҳсил дар ДДТХ рӯзона аст. Муҳлати таҳсил мувофиқи «Консепсияи ислоҳоти тиббӣ ва фарматсевтӣ дар Ҷумҳурии Тоҷикистон», ки бо қарори Ҳукумати Ҷумҳурии Тоҷикистон аз 31.10 соли 2008 таҳти №512 тасдиқ гардидааст,  дар факултети тиббӣ  6 сол, стоматологӣ 5 сол, педиатрӣ 6  сол   мебошад.

            Довталабон ба комиссияи қабул ҳуҷҷатҳои зеринро пешниҳод менамоянд:

  • ариза ба номи ректор;
  • ҳуҷҷат дар бораи таҳсилоти умумӣ (пурра), ибтидоӣ ва миёнаи касбӣ намунаи давлатӣ – нусхаи аслӣ;
  • маълумотномаи тиббӣ (шакли №086У);
  • 6 адад сурат (андозаи 3х4 см);
  • шиноснома;
  • билети ҳарбӣ ё шаҳодатномаи ҳарбии даъватшаванда;
  • хулосаи Хадамоти давлатии ташхиси тиббию иҷтимоии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар бораи манъ карда нашудани таҳсил барои довталабони маъюби гурӯҳҳои якум ва 2-юм дар ихтисос(ҳо)-и интихобкарда.  

             Шахсоне, ки дар асоси озмӯни Маркази миллии тестӣ аз имтиёзҳо бархурдор шудаанд, ҳуҷҷатҳои зеринро ба таври  ҳатмӣ пешниҳод менамоянд:  

  • ғолибони ҷойҳои аввали озмуни ҷумҳуриявӣ аз рӯи фанҳои химия ва биология соҳиби медали тилло гардидаанд - тавсияномаи Вазорати маориф ва илми  Ҷумҳурии Тоҷикистон;
  • ғолибони ҷойҳои аввали олимпиадаҳои байналмилалӣ аз рӯи фанҳои химия ва биология соҳиби медали тилло гардидаанд  -   тавсияномаи Вазорати маориф ва илми  Ҷумҳурии Тоҷикистон;
  • шахсоне, ки мактаби таҳсилоти миёнаи умумиро бо медали тилло хатм намудаанд – шаҳодатномаи Вазорати маориф ва илми Ҷумҳурии Тоҷикистон;
  • шахсоне, ки ҳамчун маъюби гурӯҳҳои 1 ва 2, мебошанд – шаҳодатномаи тиббӣ;
  • ятимони бе падару модар (то 21 сола) – нусхаи хатти вафот   бо тасдиқи натариалӣ,   

     Довталабони зикршуда   бояд ҳуҷҷатҳои лозимии тасдиқкунандаро дар муҳлати муқарраргардида ба комиссияи қабул пешниҳод намоянд. Дар мавриди саривақт пешниҳод накардани ҳуҷҷатҳо ва ё ҷой доштани камбудию норасоииҳо дар ҳуҷҷатҳои тасдиқкунанда, ҳуҷҷати онҳо қабул карда намешаванд. 

 

 Қабули ҳуҷҷатҳо аз  _____ август  оғоз ёфта то _____ августи соли 2017 идома меёбад.   

 

                                                    Нишонии мо:   735320, н. Данғара,  кӯчаи И.Шарифов -3.

                                                                         Комиссияи қабул                      Тел.: (83312) 21034, 21029

                                                                                                                        E-mail:   Этот адрес электронной почты защищён от спам-ботов. У вас должен быть включен JavaScript для просмотра.

                                                                                                                                       www.khatmedun.tj

Подкатегории