Санаи 6-уми сентябри соли 2024 дар идомаи суҳбату вохӯриҳои Раёсати донишгоҳ бо донишҷӯён дар оғози соли таҳсил, дар толори фарҳангӣ бо донишҷӯёни курси дуюм ва сеюми факултети тиббӣ, педиатрӣ ва стоматологӣ вохӯрӣ доир гардид.
    

       Санаи 5-уми сентябри соли 2024 бо иштироки васеи ҳайати профессорону омӯзгорон дар Донишгоҳи давлатии тиббии Хатлон аз ҷониби муовинати илм ва нашрия ҳамоиши илмӣ таҳти унвони “Истиқлолият неъмати бебаҳост” баргузор гардид. Дар конфронси мазкур, ҳамзамон, намояндаи мақомоти иҷроияи ҳокимияти давлатии ноҳияи Данғара низ ширкат варзид.

      Конфронс бо сухани ифтитоҳии муовини ректор оид ба илм ва нашрия, дотсент Боронов Ҳ.А. оғоз ёфт ва мавсуф аз муҳиммияти баргузории чунин ҳамоишҳои илмӣ ибрози андеша намуд. Қайд гардид, ки Истиқлолияти давлатӣ беҳтарин ва нодиртарин ганҷи миллати куҳанбунёди тоҷик мебошад ва эҳтирому арҷгузорӣ ва нигоҳдории он вазифаи ҳар яки мо шаҳрвандони Ҷумҳурии Тоҷикистон мебошад.

      Дар навбати худ мудири кафедраи ҷомеашиносӣ дотсент Гулов А.А. дар мавзуи “Истиқлолият дастоварди беназири миллати тоҷик», омузгорон: Мардонова Н.М. дар мавзуи «Истиқлолият-рамзи сулҳу ваҳдат», Қураева М.Қ. дар мавзуи «Дастовардҳои даврони истиқлолият», Шералиев Б.Р. дар мазуи «Истиқлолият - ганҷи бебаҳои миллати тоҷик» ва Нурматов У.С. дар мавзуи «Истиқлолият неъмати бебаҳост» маърузаҳои худро пешниҳоди ҳозирин намуда, аз бузургдошти ҷашни Истиқлолият, дастовардҳои замони Истиқлол, хизматҳои нотакрори Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ба даст овардани Истиқлолияти давлатӣ ва ҳамаҷониба рушд додани давлати тоҷикон, мавриди таваҷҷуҳ қарор додани соҳаи маориф ва тандурустӣ, шароитҳои фароҳамовардашуда ба соҳаи тандурустӣ дар замони истиқлол сухан намуданд.

      Намояндаи мақомоти иҷроияи ҳокимияти давлатии ноҳияи Данғара дар ҷамъбасти кори конфронс барои баргузорӣ ва арҷгузорӣ ба ин неъмати бебаҳои миллати тоҷик изҳори сипос намуда, андешаҳои олимони донишгоҳро муҳим ва ҷолиб арзёбӣ намуд.

Хабарнигори сомона.

        Санаи 5-уми сентябри соли 2024 дар толори фарҳангии донишгоҳ ҷаласаи курсӣ бо донишҷӯёни курси чор, панҷ ва шашуми факултети тиббӣ, педитарӣ ва курси чору панҷуми факултети стоматологӣ баргузор гардид, ки зиёда аз 1100 нафар донишҷӯёнро ташкил медод.

        Мақсад аз баргузории ҷаласаи курсӣ тақвият бахшидани кори таълиму тарбия, беш аз пеш аз худ намудани донишҳои тиббӣ, баланд бардоштани сатҳу сифати таълим, бо дарки масъулият ҳозир шудан ба машғулиятҳо, риояи низомнома ва қоидаҳои дохилидонишгоҳӣ, пешгирӣ аз ҳар гуна зуҳуроти номатлуб ва шомилшавӣ ба ҳизбу ҳаракатҳои ифротӣ, дурӣ ҷустан аз гуруҳҳои терроризтиву экстремистӣ, истифодаи дурусти телефонҳои мобилӣ ва шабакаҳои иҷтимоӣ, риояи сару либоси тавсиявӣ ва худдорӣ аз бегонапарастӣ, тақвият бахшидани худогоҳиву худшиносии миллӣ ва дигар масъалаҳои марбут ба таълиму тарбияи донишҷӯён мебошад.

        Декани факултетҳо, н.и.т. Холзода Ш.И. дар сухани ифтитоҳӣ бо оғози соли нави таҳсил донишҷӯёнро таҳният гуфта, вобаста ба масъалаҳои зикршуда бо донишҷӯён суҳбати озод намуд. Масъулиятнок будани табибро аз муҳимтарин хислатҳои ҳамида ҳисобида, чун ворисони ҳақиқии Абуалӣ ибни Сино ба камол расидани донишҷӯёнро таъкид намуд.

        Дар навбати худ донишҷӯён ба саволҳои худ ҷавобҳои мушаххас гирифта, риояи пурраи талаботу низомномаи донишгоҳ, иҷрои уҳдадорӣ ва вазифаи донишҷӯиро қайд намуданд.

Хабарнигори сомона.

Санаи 4-уми сентябри соли 2024, чун анъана, вохӯрии Ректори ДДТХ, д.и.т., профессор Убайдулло Қурбон бо донишҷӯёни курси аввали факултети тиббӣ, педиатрӣ, стоматологӣ, тибби профилактикӣ ва фармасевтӣ дори гардид.

Нахуст Ректори донишгоҳ донишҷӯёни курси аввалро барои сазовор гардиданд ба номи “Донишҷӯӣ” табрику шодбош намуд. Ҳамзамон, бо шинос намудани аъзои Раёсат ба донишҷӯён, Ректори донишгоҳ перомуни мақсади баргузории вохӯрӣ, имконияту шароитҳои таълиму тадрис, ҳар чӣ бештар хондану аз худ намудани донишҳои тиббӣ, масъулиятнокии донишҷӯён дар тадрис, мақому манзалати табиб, душвориҳо ва нозукиҳои илми тиб бо донишҷӯён суҳбат намуд.

Дар идомаи вохӯрӣ муовини ректор оид ба таълим ва корҳои методӣ дотсент Аҳмадиён Ш.Р. оид ба таърихи донишгоҳ, давра ба давра беҳтару хубтар гардидани шароиту имкониятҳо, дастовардҳои донишҷӯён дар давоми 8 соли фаъолияти донишгоҳ, заминаи моддӣ-техникии донишгоҳ, аввалин хатмкунандагон, фаъолияти китобхонаву лабораторияҳои фаннӣ ва дигар масъалаҳои таълимӣ суҳбат намуд.

Муовини ректор оид ба тарбия ва фарҳанг дотсент Қурбонмамадов С.Х. дар маҷмуъ доир ба фаъолияти муовинати тарбия ва фарҳанг суҳбат намуда, ҳамзамон, аз риояи либоси тавсиявӣ, пешгирӣ аз шомилшавии ҷавонон ба ҳар гуна ҳизбу ҳаракатҳои номатлуб, дуруст истифода бурдани шабакаҳои иҷтимоӣ, робитаи кураторон бо волидайни донишҷӯ, Қонунҳои Ҷумҳурии Тоҷикистон дар самти тарбия, иштироки фаъолона дар чорабиниҳои фарҳангӣ, маърифатӣ, бадеӣ ва сиёсии донишгоҳ ва берун аз онро таъкид намуд.

Декани факултетҳо, н.и.т. Холзода Ш.И. вобаста ба Қоидаҳои дохилидонишгоҳӣ, вазифа ва уҳдадориҳои донишҷӯ, рафтору муносибати донишҷӯён, иштироки фаъолона дар дарсҳо, роҳ надодан ба дермонӣ ва давомот, риояи қатъии сару либос суҳбат намуд.

Дар ҷамъбасти вохӯрӣ Ректори донишгоҳ д.и.т., профессор Убайдулло Қурбон дар чунин сатҳ баргузор гардидани суҳбат-вохӯриро бо донишҷӯёни соли аввал қаноатбахш ҳисобида, риояи тамоми уҳдадорӣ ва вазифаи донишҷӯиро дигарбора таъкид намуд.

Хабарнигори сомона.