Чорабиниҳо (122)
Маълумот доир ба чорабиниҳои ДДТХ
15 сентябри соли равон дар кафедраи анатомияи патологӣ, гистология ва тибби судӣ бо иштироки мудири кафедра н.и.т., дотсент Боронов Ҳ.А., сармутахассиси назорати сифати таълим Қурбонов Х.Ш., омӯзгорони кафедра Наботова О.З., Алиев А.А. ва дигар омӯзгорон маҳфили «Патогистологҳои ҷавон» баргузор гардид. Дар маҳфил гурӯҳҳои 303-и факултети стоматологӣ ва 309-и факултети тиббӣ иштирок намуданд.
Донишҷӯи курси 3 - юми факултети педиатрӣ Раҳимов Ф.А. дар мавзӯи «Некроз ва апоптоз» маърӯза кард.
Баъд аз баромади маърӯзачӣ дар байни донишҷӯён саволу ҷавоб баргузор гардид ва донишҷӯён ба саволхои худ ҳавобҳои қаноатбахш гирифтанд.
Бояд қайд намуд, ки бозиҳои дидактикии вобаста ба мавзӯъ хеле шавқовар гузаронида шуданд, ки ин барои боз ҳам пурра аз худ намудани мавзӯъ имконияти бештар фароҳам меоварад.
Дар давоми маҳфил мудири кафедраи анатомияи патологӣ, гистология ва тибби судӣ Боронов Ҳ.А. ва омӯзгори кафедра Наботова О.З. баъзе ҷанбаъҳои мавзӯи дар боло зикргардидаро бо далелҳои мӯътамади илмӣ пурра гардониданд, ки ин ба маҳфил ҳусни дигаре зам намуд.
КАФЕДРАИ АНАТОМИЯИ ПАТОЛОГӢ,
ГИСТОЛОГИЯ ВА ТИББИ СУДӢ
24 - уми апрели соли 2020 дар толори фарҳангии Донишгоҳи давлатии тиббии Хатлон бахшида ба 160 - солагии адиби барҷаста, мутафаккир, драмматург ва табиби бузурги рус Антон Павлович Чехов маҳфили илмӣ - адабӣ дар мавзӯи «Ҷанбаъҳои илмию маърифатӣ ва тарбиявӣ дар эҷодиёти А.П.Чехов» баргузор гардид.
Маҳфилро мудири кафедраи забонҳо, н.и.ф. Қурбонмамадов С.Х. ҳусни ифтитоҳ бахшида, аз фаъолияти маҳфилҳои илмии донишҷӯён, ки дар назди кафедра таъсис дода шудаанд, ёдрас шуд. Номбурда иброз намуд, ки баргузории маҳфилҳои илмӣ - адабӣ бахшида ба бузургдошти нобиғаҳои давронҳою замонҳо ва санаҳои таърихӣ дар кафедра ба ҳукми анъана даромадааст. Имрӯз, мо боз шоҳиди як маҳфили илмӣ - адабии дигаре мегардем, ки аз ҷониби омӯзгорон ва донишҷӯёни аъзои маҳфили «Культура речи», ки ба фаъолияти эҷодии А.П.Чехов бахшида шудааст,
Сипас, аз ҷониби профессори фахрии донишгоҳ Должикова В.А. дар мавзӯи «А.П.Чехов - табиб ва шоир» ва омӯзгори калони кафедраи забонҳо Қурбонов Х.Ш. дар мавзӯи «А.П. Чехов - инсон ва нависанда» маърӯзаи пурмуҳтаво шунида шуд. Донишҷӯи курси дуюми факултети педиатрӣ Пулатова У. доир ба ҳаёт ва фаъолияти А.П.Чехов бо истифода аз презентатсия маърӯза пешкаш намуд.
Қироати шеъру суханҳои пандомез, суруду тарона ва рақсҳои мавзун, саҳначаю намошномаҳои хурд аз рӯйи ҳикояҳои «Хирургия», «Палата №6» ва «Цветы запоздалые» - и А.П.Чехов, ки аз ҷониби донишҷӯён пешниҳод карда шуданд, ба маҳфил ҳусну таровати хоса зам намуданд.
Ректори донишгоҳ, муҳтарам Убайдулло Қурбон дар ҷамъбасти маҳфил ба ташкилкунандагон ва аъзои он изҳори сипос намуда, ба чорабинии мазкур баҳои баланд доданд ва баргузории онро як дарси муҳими тарбиявӣ, ахлоқӣ ва илмӣ унвон намуданд.
КАФЕДРАИ ЗАБОНҲО
Бо мақсади амалӣ намудани Амри Президенти Ҷумҳурии Тоҷикистон, нақшаи чорабиниҳои Мақомоти иҷроияи ҳокимияти давлатии ноҳияи Данғара ва фармоиши ректори Донишгоҳи давлатии тиббии Хатлон муҳтарам Убайдулло Қурбон оид ба гузаронидани корҳои ободонӣ ва кабудизоркунӣ бахшида ба таҷлили ҷашни 30 - солагии Истиқлолияти давлатии Ҷумҳурии Тоҷикистон кормандони донишгоҳ ва донишҷӯёне, ки аз дарсҳо фориғ буданд ба тоза кардани гирду атрофи донишгоҳ шурӯъ намуданд.
Кормандон ва донишҷӯён ба гурӯҳҳо ҷудо шуда, қисме ба даравидану тоза кардани алаф ва қисми дигарашон ба тоза кардани ду канори роҳе, ки аз байни кӯчаи ба номи Мирзо Турсунзода мегузарад, машғул шуданд.
Донишҷӯён ду тарафи роҳҳои кӯчаи мазкурро аз ҳар гуна партов ва пасмондаҳо тозаву озода намуда, ҳамзамон даруни ҷӯйборҳоро низ аз хасу хошок тоза карданд.
Қайд кардан лозим аст, ки дар тоза кардани гирду атрофи донишгоҳ саҳми раиси Кумитаи иттифоқи касабаи кормандон ва донишҷӯён Камолов Д.Ғ., мудири шуъбаи ҷавонон Раҳимов Х.С., омӯзгорони варзиш Самиев С.Ф., Қурбоналиев Ҷ.М. ва коменданти биноҳои таълимӣ дар донишгоҳ Абдуллоев М. хеле назаррас буд.
Амалӣ гардидани чунин корҳои ободонӣ ва созандагӣ аз ҷониби корхонаҳо ва муассисаҳои гуногун ба маърифати экологии аҳолӣ низ таъсиргузор хоҳад буд. Боварии комил аст, ки дар ояндаи наздик ҳар як шаҳрванди ҷумҳурӣ барои ҳифзи табиат ва покизагии муҳити зист масъулияти баланд эҳсос хоҳад кард.
ХАБАРНИГОРИ СОМОНА
8 - уми апрели соли ҷорӣ тибқи дастури Вазорати маориф ва илми Ҷумҳурии Тоҷикистон ҷиҳати иҷрои нақшаи чорабиниҳо оид ба ҷашн гирифтани 5500 - солагии Саразми Бостонӣ дар кафедраи ҷомеашиносӣ дар самти «Ташкили озмунҳо миёни донишҷӯёни муассисаҳои таълимӣ» озмун таҳти унвони «Саразм - гаҳвораи тамаддун» баргузор гардид.
Дар озмун мудири кафедраи ҷомеашиносӣ, н.и.ф. Гулов А.А., раиси Шӯрои занон ва духтарон, н.и.ф. Саидова М.Р., муовини декани факултети тиббӣ Мардонова Н., сармуҳаррири ҳафтаномаи донишгоҳии «Пайки шифо» О.Саркорӣ, омӯзгорони кафедраҳои ҷомеашиносӣ, забонҳо, химия ва билогияи тиббӣ ширкат варзиданд.
Мудири кафедраи фанҳои ҷомеашиносӣ Гулов А.А. озмуни мазкурро ҳусни ифтитоҳ бахшида, мухтасар оид ба тамаддуни қадимии халқи тоҷик суханронӣ кард.
Ассистенти кафедраи ҷомеашиносӣ Каримов М. оид ба Саразми бостонӣ, ки моҳи декабри соли 2019 бо гурӯҳи кураториаш ба ин мавзеи таърихӣ сафар карда буд, таассуроти хешро баён намуд.
Номинатсияҳои озмун пешниҳоди мақолаи беҳтарин дар бораи Саразми бостонӣ, баромад бо презентатсия, намоиши либосҳои миллӣ, тартиб додани кроссвордхо ва рақси суқдиро дар бар мегирифт.
Баъд аз баромади иштирокчиёни озмун аз рӯйи номинатсияи дар боло зикргардида, ҳайати ҳакамон озмунро ҷамъбаст намуданд.
Барои номинатсияи пешниҳоди мақолаҳо сармуҳаррири «Пайки шифо» О.Саркорӣ баҳогузорӣ намуда қайд кард, ки мақолаҳо қариб, ки ҳама якхела буда, бо мазмунҳои ба ҳам монанд пешниҳод гардидаанд. Бинобар ин, лозим аст, ки дар давраҳои дуюм ва сеюми озмун мақолаҳои беҳтар бо нишон додани сарчашмаҳо ва адабиёт пешниҳод карда шаванд.
Аз рӯйи номинатсияи презентатсияҳо оид ба Саразми бостонӣ презентатсияи донишҷӯи курси дуюми факултети педиатрӣ Раҷабзода Нигина беҳтарин дониста шуд.
Ҳайати ҳакамон аз рӯйи номинатсияи намоиши либосҳои миллӣ донишҷӯи курси 2-юми гурӯҳи 208-и тиббӣ Ҳусейнова Ситора ва номинатсияи рақси суқдӣ донишҷӯи курси 2-юми гурӯҳи 210-и тиббӣ Давлатова Элеонораро сазовори ҷойи аввал донистанд.
Кроссворди тартибдодаи донишҷӯи курси дуюми факултети педиатрӣ Дусматов Давлат ва ролики пешниҳоднамудаи донишҷӯи курси дуюми гурӯҳи 204-и педиатрӣ Сафолов Мустафо низ диққати ҳайати ҳакамонро ба худ ҷалб намуда, беҳтарин дониста шуданд.
Озмунро мудири кафедраи ҷомеашиносӣ Гулов А.А. ҷамъбаст намуда, қайд кард, ки донишҷӯён дар давраҳои дуюм ва сеюм бояд ба озмуни мазкур тайёрии ҳаматарафа ва ҷиддӣ бинанд.
Бояд қайд намуд, ки дар баргузор намудани чорабинии мазкур саҳми ассиситенти кафедраи ҷомеашиносӣ Қураева М. хеле назаррас буд.
КАФЕДРАИ ҶОМЕАШИНОСӢ
27 - уми марти соли равон ҷиҳати иҷрои Амри Президенти Ҷумҳурии Тоҷикистон бахшида ба эълон гардидани солҳои 2019 - 2021 «Солҳои рушди деҳот, сайёҳӣ ва ҳунарҳои мардумӣ», қарори раиси вилояти Хатлон дар бораи «Барномаи рушди сайёҳӣ дар вилояти Хатлон барои солҳои 2018 - 2019» ва ҳамзамон, таҷлили ҷашни байналмилалии Наврӯз бо ташаббуси раёсати Донишгоҳи давлатии тиббии Хатлон дар донишгоҳи мазкур Конференсияи вилоятии Брендикунонии Наврӯз таҳти унвони «Наврӯз - бренди миллии сайёҳӣ» баргузор гардид.
Дар конференсия 17 нафар масъулони соҳаи сайёҳии шаҳру ноҳияҳои вилояти Хатлон, аз ҷумла, муовини сардори Раёсати рушди сайёҳии Кумитаи сайёҳии назди Ҳукумати Ҷумҳурии Тоҷикистон Мирзоев Ф., сардори шуъбаи рушди сайёҳии Мақомоти иҷроияи ҳокимияти давлатии вилояти Хатлон Салимзода Ш., сармутахассиси кор бо ҷавонон ва варзиши ноҳияи Данғара - Раҳимзода Ф., намояндагони бахши сайёҳӣ аз ноҳияҳои Дӯстӣ, Абдураҳмони Ҷомӣ, Ҷалолиддини Балхӣ, Ёвон, Балҷувон ва Данғара, инчунин, донишҷӯёни риштаи сайёҳии Донишгоҳи давлатии Данғара, донишҷӯён ва омӯзгорони Донишгоҳи давлатии тиббии Хатлон ва Коллеҷи тиббии ДДТХ ширкат варзиданд.
Конференсияро муовини ректор оид ба корҳои маъмурӣ ва хоҷагӣ, (сарвари клуби сайёҳии ДДТХ) - Аҳадов Ш.Ф. ҳусни ифтитоҳ бахшид. Номбурда ҳозиринро бо ҷашни байналмилалии Наврӯз табрик намуда, ҳамзамон оид ба аҳамияти соҳаи сайёҳӣ ва рушди он дар вилояти Хатлон маълумот дод.
Сардори шуъбаи рушди сайёҳии Мақомоти иҷроияи ҳокимияти давлатии вилояти Хатлон Салимзода Ш. оид ба моҳияти брендикунони иди Наврӯз суханронӣ намуд.
Муовини сардори Раёсати рушди сайёҳии Кумитаи сайёҳии назди Ҳукумати Ҷумҳурии Тоҷикистон Мирзоев Ф. оид ба расму оинҳои ҷашни Наврӯз сухан ронда, қайд намуд, ки гарчанде табиати зебо ва кӯҳсори Тоҷикистон диққати сайёҳони зиёдро ба худ ҷалб менамояд, вале даъвати онҳо дар фасли баҳор, махсусан дар иди Наврӯз ҷиҳати намоиши фарҳанги миллии тоҷикон барои ҷаҳониён ва афзун намудани шумораи сайёҳон боз ҳам мувофиқ аст. Бинобар ин, барои мо лозим аст, ки ҷашни Наврӯзро ҳамчун бренди миллии сайёҳӣ истифода намоем.
Ҳамзамон, дар конференсия омӯзгори кафедраи ҷомеашиносии ДДТХ Каримов М. оид ба аҳамияти соҳаи сайёҳӣ маълумот дод.
Донишҷӯёни курси 3-юми факултети тиббӣ Ҷомиева С. (бо забони англисӣ) ва Абдуллоев Б. (бо забони русӣ) дар мавзӯи «Нақши клуби сайёҳии ДДТХ дар рушди туризми дохилӣ» баромад намуданд.
Конференсияро муовини ректор оид ба корҳои маъмурӣ ва хоҷагӣ Аҳадов Ш.Ф. ҷамъбаст намуд. Қайд гардид, ки дар рушди соҳаи сайёҳӣ саҳми кормандони тиб низ хеле муҳим аст, бинобар ин донишҷӯёни Донишгоҳи давлатии тиббии Хатлон ва донишҷчӯёни Коллеҷи тиббии ДДТХ - ро лозим аст, ки ба омӯзиши забонҳои русӣ ва англисӣ диққати ҷиддӣ диҳанд.
ХАБАРНИГОРИ СОМОНА
21 - уми марти соли 2020 дар Донишгоҳи давлатии тиббии Хатлон барои ҷашн гирифтани иди Наврӯзи байналмилалӣ чорабинии бошукӯҳи фарҳангӣ баргузор гардид.
Сараввал, дар дохили донишгоҳ расму русум, анъана ва таомҳои наврӯзӣ, аз қабили «Ҳафт син» ва «Ҳафт шин» ба намоиш гузошта шуд.
Чорабинии фарҳангиро ректори Донишгоҳи давлатии тиббии Хатлон д.и.т., профессор Убайдулло Қурбон ҳусни ифтитоҳ бахшиданд. Номбурда ҳозиринро ба муносибати Иди байналмилалии Наврӯз табрику таҳният гуфта, аз ҷумла қайд намуданд, ки «Наврӯзи Аҷам ин худ як василаест, ки тоҷикон ва форсизабонони тамоми ҷаҳон дар оғози сол бо нияти зиндаву ҷовид нигоҳ доштани хусусиятҳои неки фарҳангӣ ва тамаддуни шарқии хеш якпорчагиву ваҳдати миллӣ, сулҳу дӯстӣ ва ободӣ онро ҷашн мегиранд».
Баъд аз табрикот ректори муҳтарам ба ғолибони озмуни «Маликаи Наврӯзӣ» ва «Гулбазми Наврӯзӣ», ки қаблан ба муносибати идҳои баҳорӣ дар донишгоҳ баргузор гардида буданд, туҳфаҳои хотиравӣ ва Ифтихорнома супориданд.
Барномаи фарҳангӣ бо даъвати «Бобои Деҳқон», «Маликаи Баҳор», «Маликаи Наврӯз» ва «Шоҳ Ҷамшед» оғоз гардида, аз хондани шеъру суруд, рақсу бозӣ, намоиши либосҳои миллӣ ва ҳаҷвҳои наврӯзӣ иборат буд.
Дар анҷоми барнома Ректори донишгоҳ муҳтарам Убайдулло Қурбон бори дигар ҳозиринро ба фарорасии Иди байналмилалии Наврӯз табрик карда, барои баргузории чунин чорабинии бошукӯҳу шаҳомат ба ташкикунандагон ва таҳиягарони барномаи Наврӯзӣ изҳори сипос намуданд.
ХАБАРНИГОРИ СОМОНА
22 - марти соли равон дар боғи фарҳангию фароғатии Хуррамшаҳри ноҳияи Данғара бо иштироки Раиси ноҳияи Данғара Раҳмон Исломиддин Хайриддин ҷашни Наврӯзӣ баргузор гардид.
Аз Донишгоҳи давлатии тиббии Хатлон дар таҷлили ҷашни Наврӯзӣ дар боғи Хуррамшаҳр муовинони ректор, раиси Шӯрои занон ва духтарон, мудирони кафедра, омӯзгорон ва донишҷӯён ширкат варзиданд.
Дар ҷашни мазкур аз ҷониби донишҷӯёни ДДТХ ҳунарҳои мардумӣ, дастовардҳои донишгоҳ, китобҳо, таомҳо ва либосҳои миллӣ ба намоиш гузошта шуд.
Қайд кардан зарур аст, ки донишҷӯи курси дуюми факултети тиббӣ - Қурбонхолзода Шукрона, ки қаблан дар озмуни ноҳиявии «Маликаи Наврӯз» ғолибият ба даст оварда буд, дар ҷашни мазкур ҳамчун Маликаи Наврузӣ ширкат варзид.
ШӮРОИ ЗАНОН ВА ДУХТАРОН
Бо мақсади иҷрои Амри Президенти Ҷумҳурии Тоҷикистон аз 13-уми декабри соли 2018 «Ҷадвали баргузории фестивал, ид, озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019 - 2021», дар асоси мактуби муовини раиси вилояти Хатлон ва Мақомоти иҷроияи ҳокимияти давлатии ноҳияи Данғара 27-уми феврали соли равон дар Донишгоҳи давлатии тибби Хатлон бахшида ба эълон гардидани «Соли рушди сайёҳӣ ва ҳунарҳои мардумӣ» дар байни донишҷӯён озмуни «Рӯзғордорӣ» баргузор гардид.
Озмуни мазкур аз ҷониби муовинати тарбия ва фарҳанг ва Шӯрои занон ва духтарон роҳандозӣ гардид.
Дар озмун ҳайати ҳакамон аз Мақомоти иҷроияи ҳокимияти давлатии ноҳияи Данғара ва намояндагон аз шуъбаи маорифи ноҳияи Данғара ширкат варзиданд.
Донишҷӯёни курси 2-юми факултети тиббӣ - Ҳусейнова С., курси 3-юми факултети педиатрӣ Азизмамадова О., курси 3-юми факултети педиатрӣ Бобоева С. ва курси 4-уми факултети стоматологӣ - Ҷумъаева Г. ҳамчун иштирокчӣ ҳунарҳои худро ба ҳайати ҳакамон ва нишастагони толор намоиш доданд.
Донишҷӯёни мазкур тибқи Низомномаи озмун оид ба оростани дастархони тоҷикӣ бо пешниҳоди таомҳои миллӣ, тарзи тайёр намудани як намуди таоми миллӣ ва муаррифии он, маҳорати пухтани нон ва маҳсулоти нонӣ, пешниҳоди ҳунарҳои тарроҳӣ, гулдӯзӣ, зардӯзӣ ва бофандагӣ, маҳорати қабули меҳмон ҳунарҳои худро нишон доданд.
Аз ҷониби ҳайати ҳакамон, аз ҷумла, мудири шуъбаи кор бо занон ва оилаи МИҲД ноҳияи Данғара - Сайфуллоева Н., сармутахассиси шуъбаи рушди иҷтимоӣ ва робита бо ҷомеаи дастгоҳи раиси ноҳия Музаффарова М., сармутахассиси шуъбаи ташкилӣ ва кадрҳои дастгоҳи раиси ноҳия - Тоҳирзода Б. ва дигарон ба ҳунарҳои иштирокчиёни озмун баҳои баланд дода шуд.
Дар давоми озмун барои болидахотирии аҳли толор аз ҷониби донишҷӯён барномаи фарҳангӣ пешкаш гардид.
ХАБАРНИГОРИ СОМОНА
