15 - уми марти соли равон дар ДДТХ вохӯрии намояндагони ШКДАМ дар ноҳияи Данғара, ШВКД дар ноҳияи Данғара ва Раёсати кор бо ҷавонони дастгоҳи марказии Кумитаи кор бо ҷавонони назди Ҳукумати Ҷумҳурии Тоҷикистон бо ҳайати профессорону омӯзгорон ва донишҷӯёни ДДТХ баргузор гардид.

      Дар вохӯрӣ Иброҳимзода А.- сардори Раёсати кор бо ҷавонони дастгоҳи марказии кумитаи кор бо ҷавонони назди Ҳукумати Ҷумҳурии Тоҷикистон, Собиров Р. - муовини сардори ШКДАМ дар ноҳияи Данғара, Раҳимзода Ф. - мудири шуъбаи кор бо ҷавонони ноҳияи Данғара, Қунғуротзода А. - сардори шуъбаи ноболиғон ва кор бо ҷавонони ШВКД дар ноҳияи Данғара, муовинони ректор, декани факултетҳо, сардорони шуъбаҳо, марказҳо, ҳамзамон ҳайати профессорону омӯзгорон ва донишҷӯёни ДДТХ иштирок карданд.

        Ҷаласаро муовини ректор оид ба корҳои таълимӣ ва методӣ н.и.с. Аҳмадиён Ш.Р. ҳусни ифтитоҳ бахшид.

     Ҳадафи асосии ҷаласа таҳкими ҳувияти миллӣ, эҳтиром гузоштан арзишҳои миллӣ ва тақвият бахшидан ба донишҳои сиёсӣ, барои пешгирии ҷавонон аз шомилшавӣ ба ҳизбу ҳаракатҳои террористӣ ва эстремистиро дар бар мегирифт. Аз ҷумла, таҷлили “Иди Наврӯз” яке аз ҷашнҳои муътабартарини ориёиҳои  аҳди бостон буда, яке аз арзишҳои гаронмояи халқи тоҷик мебошад, ки сарчашма ва манобеи таърихӣ ба он гувоҳанд.

    Ҳамзамон, намояндагони мақомот қайд намуданд, ки дар шароити имрӯзаи геополитикии ҷаҳон бархурди манфиат ва мураккаб гардидани муносибатҳои байниминтақавӣ авҷ гирифта истода, маҳз паст будани  таҳкурсии маърифати динӣ ва дунявӣ, арзиши миллии фарҳангӣ, худшиносии шаҳрвандӣ, садоқатмандӣ, ватандӯстӣ, шомилшавии ҷавонони Тоҷикистонро ба равияҳои бегонаи тундрав ба миён меоранд. Бинобар ин, ҷавононро зарур аст, ки ба мутолиа ва таҳсил  машғул шуда, ҷаҳонбинии хешро васеъ намоянд ва тафаккури таҳлилии хешро боз ҳам сайқал диҳанд.

      Дар анҷоми ҷаласа донишҷӯёни фаъол ва омӯзгорони ҷавон барои фаъолияти назаррас дар корҳои ҷамъиятӣ бо “Сипоснома”-и Кумитаи кор бо ҷавонони назди Ҳукумати Ҷумҳурии Тоҷикистон сазовор гардиданд.

ХАБАРНИГОРИ СОМОНА