16 ноябри соли ҷорӣ равон дар Донишгоҳи давлатии тиббии Хатлон бахшида ба Рӯзи Президенти Ҷумҳурии Тоҷикистон чорабинии фарҳангӣ - адабӣ бо иштироки омӯзгорон ва донишҷӯён баргузор гардид.

   Сараввал, аз ҷониби муовини ректор оид ба таълим Аҳмадов Ш.Р. табрикоти Ректори Донишгоҳи давлатии таббии Хатлон д.и.т., профессор Убайдулло Қурбон ба муносибати Рӯзи Президенти Ҷумҳурии Тоҷикистон қироат гардид. Инчунин, оид ба хизматҳои содиқона ва арзандаи  фарзанди фарзонаи халқи тоҷик, Пешвои миллат, муҳтарам Эмомалӣ Раҳмон суханронӣ намуд.

   Дар идомаи чорабинӣ композитсияи адабӣ - мусиқӣ таҳти унвони «Ӯ ҷони миллат аст» ба намоиш гузошта шуд. Бояд қайд намуд, ки слайдҳое, ки  оид ба фаъолияти Президенти кишвар аз соли 1992 то инҷониб ба намоиш гузошта шуда буданд, ба чорабинии мазкур ҳусни тозае зам намуд.

   Чорабинӣ аз қироати шеърҳо дар васфи Президенти муҳтарам Эмомалӣ Раҳмон, иҷрои сурудҳои дилнишин дар васфи Ватан ва рақсҳои миллии тоҷикӣ иборат буд.  Дастаи ҳунарии «Дурахшон» - и ДДТХ бо ҳунарнамоии хеш дилҳои ҳозиринро  шод намуданд.

   Дар анҷоми чорабинии фарҳангӣ ба ташкилкунандагон ва таҳиягарони барномаи фарҳангӣ - адабӣ барои дар сатҳи баланд баргузор намудани чорабинии мазкур изҳори сипос карда шуд.

ХАБАРНИГОРИ СОМОНА